Інфармацыйна-краязнаўчы цэнтр Бярэзінскай раённай бібліятэкі наведала прыхільніца роднай мовы і беларускасці, жыхарка вёскі Міластава Цэдрык Ганна Васільеўна. Былы інжынер сталічнага завода “Інтэграл” , з 1998 года жанчына пражывае ў бацькоўскай хаце на малай радзіме. Нераўнадушная да зберажэння гістарычнай спадчыны зямлячка ў свій час падаравала партыю этнаграфічных экспанатаў у фонд будучага раённага гісторыка-краязнаўчага музею. Цікавасць да гісторыі роднага краю ў нараджэнкі бярэзінскай вёскі – не паказная дэкарацыя, а стыль жыцця. Чытанне беларускамоўных мастацкіх твораў для Ганны Цэдрык – сапраўднае свята душы.